Tababbar ay ka qaybgalayaan 12 Haween ah, oo ka kala socda qaybaha kala duwan ee warbaahinta laguna baranayo hogaaminta iyo maamulka warbaahinta ayaa ka furmay maanta (30-Nov-2019,) magaalada Kismaayo ee xarunta gobolka Jubbada hoose.
Tababbarka waxaa soo qaban qaabisay Media Women Networka, tababarkan oo laba maalmood soconaya ayaa waxaa taageeraya hay’adaha IMS iyo FOJO, oo ka shaqeeya hormarinta warbaahinta Soomaaliya. Waxaa si ggaar ah loogu barayaa haweenka sida ay uga mid noqon karaan hogaanka warbaahinta, isku dheelitirnaanta sheekooyinka labka iyo dhedigga, sidee u raadan karaan xaqooda dhan walba, sidee wax looga badali karaa haweenka ka shaqeeya warbaahinta ee aan wali ka gudbin war-akhrinta iyo barnaamijyada maddaalada.
Furitaanka barnaamijka waxaa ka soo qaybgalay wasiirka haweenka ee dowlad goboleedka Jubbaland, Marwo Qamar Deeq Khaliif iyo wasiirka warfaafinta, Cabdi Xuseen Sh. Maxamed.
Cabdi Xuseen Sh. Maxamed oo goobta ka hadlay ayaa yiri “Waxaan MWN uga mahad celinaynaa hawshan quruxda badan ee ay wadaan, laakiin waxaan ka codsanayaa in ay joogteeyaan dhiirigalinta haweenka saxaafadda ka shaqeeya oo aysan noqonin tababbarkii ugu horreeyey” Wasiirka Haweenka Jubbaland Marwo Qamar Deeq Khaliif ayaa dhankeeda tiri “Waxaa muhiim ah in haweenka suxufiyiinta ah ay isku duubnaadaan sidoo kalana isku tiirsanaadaan si ay doorkooda warbaahineed u muujiyaan. Xuquuqda haweenka ayay ka mid tahay in dumarka la tababbaro si xirfadooda u hormarto”
Media Women Network, waxay dedaal ugu jirtaa sidii isbadal dhab ah loo gaari lahaa, haddaba si taas looga dhabeeyo waxaa muhiim in la helo hannaan haweenka lagu dhiirgaliyo si ay uga baxaan xaaladda ay hadda ku shaqeeyaan.
“Tababbarkaan wuxuu noo yahay muhiim haddii aannu nahay gabdhaha ka shaqeeya warbaahinta Jubbaland, sababtoo ah waxaa uu sare u qaadayaa kalsoonida iyo hamiga shaqo ee hablaha, waxaa uu sidoo kale fursad siinayaa inay gabdhuhu awood Maamul iyo hogaamin yeeshaan,”. Najmo Cismaan oo ka tirsan weriyayaasha magaalada Kismaayo ayaa sidaa tiri.
